ბმულები ხელმისაწვდომობისთვის

კახა იმნაძე ბან კი მუნს და ვიტალი ჩურკინს შეხვდა


კახა იმნაძე, ამერიკის ხმა, 7 აგვისტო, 2013

კახა იმნაძე გაეროში რუსეთის მისიის მუდმივ წარმომადგენელთან ვიტალი ჩურკინთან კოლეგიალურ ურთიერთობას აპირებს თეა თუაშვილი

გთხოვთ, დაიცადოთ

No media source currently available

0:00 0:15:27 0:00
ბმული

გაეროს გენერალურ მდივანთან შევედრის და რწმუნებათა სიგელების გადაცემის შემდეგ გაეროში საქართველოს მუდმივი წარმომადგენელი კახა იმნაძე პირველ ინტერვიუს „ამერიკის ხმის“ ნიუ იორკის კორესპონდენტს თეა თუაშვილს აძლევს. კახა იმნაძე დევნილთა დაბრუნების დაწყების პროცესზე, გაეროს მონიტორინგის მისიის აღდგენაზე კონფლიქტის ზონებში და რუსეთის როლზე საუბრობს. მან ასევე კომენტარი გააკეთა დიმიტრი მედვედევის განცხადებებთან დაკავშირებითაც, რომ რუსეთი სამხრეთ ოსეთში გაეროს წესდების 51 მუხლის მიხედვით მოქმედებდა. კახა იმნაძე გაეროში რუსეთის მისიის მუდმივ წარმომადგენელთან ვიტალი ჩურკინთან კოლეგიალურ ურთიერთობას აპირებს.

ამერიკის ხმა: სულ რამდენიმე დღის წინ შეხვდით გაეროს გენერალურ მდივანს ბან კი მუნს და რწმუნებათა სიგელები გადაეცით, ფაქტობრივად, ამ ცერემონიის შემდეგ ოფიციალურად შეუდექით გაეროში საქართველოს მუდმივმოქმედი მისიის ხელმძღვანელის მოვალეობის შესრულებას. ეს იყო თქვენი პირველი შეხვედრა გაეროს გენერალურ მდივანთან. თუ შეიძლება გვითხარით, როგორ ჩაირა ამ შეხვედრამ და რა თემებზე იყო საუბარი?

კახა იმნაძე: დიდი მადლობა მოწვევისთვის. მოგესალმებით, მივესალმები აუდიტორიას. თქვენ მართალი ბრძანეთ, დაახლოებით ათი დღეა გასული რაც გადავეცი გაეროს გენერალურ მდივანს ბატონ ბან კი მუნს რწმუნებათა სიგელები, შემდეგ ტრადიციულად გვქონდა მოკლე შეხვედრა, რომელიც ყოველთვის ასეთ დროს გაცნობით ხასიათს ატარებს, მაგრამ რამდენიმე წუთით ეხები ხოლმე იმ საკითხებს, რომელიც ქვეყანას აინტერესებს. მე რა თქმა უნდა მას მადლობა გადავუხადე იმ ჩართულობისთვის, რომელიც გაეროს აქვს, გენერალური მდივნის სპეციალური წარმომადგენლის სახით. ჩვენს პრობლემატიკაში მოგეხსენებათ არსებობს რეზოლუცია, ადგილნაცვალ პირებთან დაკავშირებით, რომელიც ჰუმანიტარულ ხასიათს ატარებს და ძალიან მნიშვნელოვანია საქართველოსთვის. და რა თქმა უნდა ჟენევის ფორმატში გაეროს მონაწილეობა სხვა ინსტიტუტებთან ერთად. ამ თემებზე გვქონდა საუბარი, გაერო მომავალშიც გააგრძელებს თავის ჩართულობას და ბუნებრივია ჩვენი მხრიდანაც არავითარი შესუსტება არ იქნება. ბუნებრივია ის პრიორიტეტი, რომელიც არსებობდა, ამ ხნის მანძილზე გაგრძელდება.

ამერიკის ხმა: როგორ წარმოგიდგენიათ თანამშრომლობა რუსეთთან, რომელიც არის გაეროს უშიშროების საბჭოს მუდმივმოქმედი წევრი, აქვს ვეტოს უფლება, რომელიც უკვე გამოიყენა გაეროს სამშვიდობო კონტიგენტის ყოფნასთან დაკავშირებით აფხაზეთის და სამხრეთ ოსეთის ტერიტორიაზე. ყველას უჭირდა პრინციპში ვიტალი ჩურკინთან საერთო ენის გამონახვა. ვიცით, რომ კონსულტაციები გაქვთ თქვენ სხვადასხვა ქვეყნის წარმომადგენლებთან, დელეგაციის ხელმძღვანელებთან, რამდენად წარმოგიდგენიათ რომ გავარღვიოთ ეს პრობლემა, რომელიც არსებობდა აქამდე საქართველოს წარმომადგენლებსა და რუსეთის დელეგაციას შორის, იყო თუ არა კონტაქტის მცდელობა ვიტალი ჩურკინთან, ახლა გვერდს ვერ აუვლიათ თქვენ ამ საკითხს, იმიტომ რომ რუსეთთან მუდმივად გვექნება პრობლემები, საკითხები, რომელიც უნდა გავარკვიოთ.

კახა იმნაძე: ბუნებრივია ერთ შენობაში გვიწევს ყოფნა და მუშაობა, ამაში დაგეთანხმებით, ერთს დავამატებდი, ვერ დაგეთანხმებით რომ ყველა წარმომადგენელს ჰქონდა მასთან ურთიერთობის პრობლემა. იყო შემთხვევები, როდესაც კოლეგიალური ურთიერთობები არსებობდა. ცხადია, ის პრობლემატიკა რომელიც დღეს არის, ართულებს ქვეყნებს შორის ურთიერთობას, არის საკითხები, რომელიც არის საქართველოს ინტერესებში და მე ბუნებრივია, ვარ ამ ინტერესების გამომხატველი. რა თქმა უნდა ვიტალი ჩურკინიც გამოხატავს თავისი ქვეყნის ინტერესებს. ანუ, არის აქ საკითხები, სადაც ჩვენი თანხვედრა რა თქმა უნდა არ იქნება, მაგრამ ამას გარდა გაერო არ არის მხოლოდ ორი სახელმწიფოს ურთიერთობა. გაერო არის ყველაზე დიდი საერთაშორისო ორგანიზაცია, სადაც არის უამრავი საკითხი, მსოფლიო საკითხი, სადაც ყველა სახელმწიფო ერთმანეთთან თანამშრომლობს, მათ შორის ისეთიც, რომელთა შორისაც არის კონფლიქტი. ამ თვალსაზრისით ასეთი მუშაობა იქნება. რაც შეეხება შეკითხვას, გვქონდა თუ რა მასთან შეხვედრა. ერთ-ერთ მიღებაზე ჩვენ გადავიკვეთეთ, გვქონდა ხანმოკლე საუბარი, გაგვაცნეს ერთმანეთი ჩვენმა პარტნიორმა სახელმწიფოებმა. -ნი ჩურკინი ერთ-ერთი ყველაზე გამოცდილი დიპლომატია, როგორც რუსეთის საგარეო საქმეთა სამინსიტროში , ისე მსოფლიო დიპლომატიურ წრეებში. მე მახსოვს იგი, როდესაც ბრუსელში ელჩად ჩამოვიდა. მაშინ იქ ვმუშაობდი, ნატოში მისიის ხელმღვანელის მოადგილე ვიყავი, ბატონი ზურაბ აბაშიძე იყო მაშინ ჩვენი ელჩი ნატოში და მაშინ გვქონდა ჩვენ პირველი შეხვედრა, თუმცა მას მერე მე საქართველოში დავბრუნდი, ანუ ჩვენს შორის რაიმე ურთიერთობა არ ჩამოყალიბებულა მაგრამ, რაც შეეხება აქ, მე ვაპირებ მასთან ჩვეულებრივი კოლეგიალური ურთიერთობის ქონას, რა თქმა უნდა ჩემი სახელმწიფოს ინტერსების გათვალისწინებით.

ამერიკის ხმა: თავად ბან კი მუნის მოსაზრება როგორია ბოლო რეზოლუციასთან დაკავშირებით, სადაც საუბარია იძულებით გადაადგილებულ პირთა და დევნილთა სტატუსის შესახებ თემატიკაზე, იქ საუბარია როგორ უნდა მოხდეს მათი დაბრუნება საკუთარ მიწა-წყალზე. უნდა შედგეს გრაფიკი, ეს არის დოკუმენტი ჟენევის მოლაპარაკებებში ჩართული მხარეებისთვისაც, მათ უნდა იმოქმედონ ამ გეგმის და დოკუმენტის მიხედვით. გრაფიკის შედგენაზე იყო პრობლემა, იყო საუბარი იმაზე, რომ ამის დრო არ არის ახლა, თვითონ ადგილზე არ არის შექმნილი ასეთი სიტუაცია. თქვენ როგორ გესახებათ, დევნილების დაბრუნების პრობლემა, დიმიტრი მედვედევის გუშინდელი განცხადებაც, რომ მას საწინააღმდეგო არაფერი აქვს, თუ ეს ხალხის ნება იქნება. რამდენად მზად არის სიტუაცია კონფლიქტის ზონებში რომ ამ გრაფიკმა დაიწყოს მუშაობა?

კახა იმნაძე: იცით, თქმა იმისა რომ ყველაფერი ხვალ მზად იქნება არასერიოზულია. ეს არის მეტად რთული გზა. თავად გაეროს მიდგომა და ჩართულობა მოწმობს იმას, რომ გაერო-არა მხოლოდ სეკრეტარიატის დონეზე არამედ, რაც მთავარია, წევრი სახელმწიფოების დონეზე მზად არის რომ ამ საკითხის გადაწყვეტისკენ გააგრძელოს მუშაობა. რაც ჩვენთვის არის ძალიან მნიშვნელოვანი. განცხადებას, რომელსაც შეეხეთ რა თქმა უნდა მაგ თვალსაზრისით ასევე პოზიტიურია. რაც შეეხება მზაობას ადგილზე, ბუნებრივია სჭირდება გარკვეული დრო, მუშაობა. არასერიოზული იქნება ჩემი მხრიდან დეტალებზე საუბარი, რადგან აქ უკვე სხვა სტრუქტურები არიან ჩართული ამასთან დაკავშირებით, მაგრამ მთავარია ჩვენ წავიდეთ სწორი მიმართულებით და მე მგონი ეს სვლა, ეს გზა სწორია რომ დაიწყოს დევნილთა დაბურნება. და რაც მთავარია როცა ვსაუბრობთ ამ თემაზე, ვსაუბრობთ და ხაზს ვუსვამთ, და ეს არის შეტანილი რეზოლუციაში, აქ საუბარია ღირსეულ დაბრუნებაზე, უსაფრთხო დაბრუნებაზე, მათი უფლებების აღდგენაზე, მათ შორის ქონებრივ უფლებებზე. ეს ყველაფერი კომპლექსშია და არ არის მარტივი საკითხი, ამიტომ ვამბობ რომ მთავარია, რომ ჩვენ სწორი მიმართულებით ვიაროთ და მივიდეთ აი ამ ჩვენ საბოლოო მიზნამდე.

ამერიკის ხმა: რაც შეეხება გაეროს სამშვიდობო კონტიგენტის დაბრუნებას კონფლიქტის ზონებში. ამ საკითხზე თუ იყო ბან კი მუნთან საუბარი?

კახა იმნაძე: ამ საკითხზე მე გუშინაც გამოვედი. იყო ღია დებატები უშიშროების საბჭოში. ჩემს გამოსვლაში მე შევეხე, როგორც თანამშრომლობის პერსპექტივებს და არსებულ თანამშრომლობას გაეროსა და გუამს შორის, სადაც წლევანდელ წელს საქართველო არის პრეზიდენტი ქვეყნის როლში, აგრეთვე გაეროს თანამშრომლობას როგორც ეუთოსთან, ასევე ევროკავშირთან იმ კონტექსტში, რაც ეხება საქართველოს, კერძოდ ჟენევის საერთაშორისო მოლაპარკებები და მანდვე აღვნიშნე გალის ინციდენტებისა და პრევენციების მექანიზმების პრობლემა. ის საკითხი, რომ ახლა ჩვენთან ევროკავშირის მონიტორინგის მისია ბოლომდე არ ფუნქციონირებს კონფლიქტის მეორე მხარეს, ანუ მხოლოდ ჩვენს მხარეს არის. ეს საკითხი ზოგადად დგას ჩვენს დღის წესრიგში და ამისი მოთხოვნა ხდება ხოლმე. მაგრამ საკითხი არ არის მარტივი. აქაც ალბათ ყველამ უნდა ვიცოდეთ, რომ საერთაშორისო ურთიერთობებში სწრაფად არაფერი ხდება. მთავარია იყოს სწორი მიმართულება და გეზი. ამ მიმართულებითაც მიდის მუშაობა.

ამერიკის ხმა: ხუთი წელი გავიდა უკვე რუსეთ-საქართველოს ომიდან. იყო მედვედევის ინტერვიუ, სადაც ის საუბრობს იმაზე რომ მათ იმოქმედეს გაეროს წესდების 51 მუხლის შესაბამისად სხვა ტერიტორიაზე სამშვიდობო კონტიგენტზე თავდასხმის დროს თავდაცვის უფლებით. მედვედევი მაშინ იყო პრეზიდენტი და რამდენად სწორია საკითხის ასე დაყენება რომ ეს იყო თავდაცვითი მექანიზმი. რამდენად ეთანხმებით ამ ფორმულირებას?

კახა იმნაძე: ხშირად არის შემთხვევა, როდესაც ესა თუ ის სახელმწიფო თავისებურ ინტერპრეტირებას ახდენას ამ თუ იმ დოკუმენტისას, მაგრამ როდესაც საუბარია სამწუხარო დღეებზე, აგვისტოს ომზე ალბათ ყველაზე სწორი იქნება დავუბრუნდე ტალიავინის დასკვნას, რადგან ეს არის საკმაოდ ყოვლისმომცველი საერთაშორისო დონეზე შეფასებული დოკუმენტი და დასკვნა ყველაფერი იმისა რაც მოხდა. ამიტომ დღევანდელ დღეს შეიძლება სხვადასხვა განცხადებები გაკეთდეს - ზოგმა ერთი მხარე დაიცვას, ზოგმა მეორე, მაგრამ საფუძველი საიდანაც ჩვენ უნდა გამოვიდეთ ეს არის ტალიავინის კომისიის დასკვნა და ეს არ არის ერთი ადამიანის დასკვნა ხომ, ეს არის საკმაოდ სერიოზული ჯგუფის მიერ შესწავლილი პრობლემა და ეს დოკუმენტი მნიშვნელოვანია დოკუმენტია, ანუ მე დავეყრდნობი მაინც იმას, რასაც უნდა დავეყრდნო.

ამერიკის ხმა: როგორ წარმოგიდგენიათ თქვენი მუშაობა, იმის გათვალისწინებით რაც მოხდა ხუთი წლის წინ. რამდენად რთული იქნება, ფაქტიურად ნახევარი გზიდან უნდა დაიწყოთ იმ საქმის გაგრძელება, რაც დაწყებული იყო. გაერო ძალიან აქტიურად იყო ჩართული რომ არ მომხდარიყო სიტუაციების გამწვავება. აი ახლა რა მოლოდინი გაქვთ, რამდენად დარწმუნებული ხართ იმაში, რომ ეს პროცესი უფრო მალე წაიწევს წინ და არ მოგვიწევს დიდი ლოდინი დევნილთა დაბრუნების პროცესის დასაწყებად.

კახა იმნაძე: დავიწყებ იმით რომ საქართველოს მისია ძალიან კარგად მუშაობდა. რა თქმა უნდა ჩემი მხრიდანაც ვეცდები რომ კიდევ უფრო გავაღრმავო მუშაობა ამ მიმართულებით. უფრო აქტიურები ვიყოთ, ხოლო ჩემს შემდეგ ვინც მოვა ის კიდევ უფრო შორს უნდა წავიდეს ბუნებრივია სხვა მხრივ, პროგრესი წარმოუდგენელია. ვერ ვიმარჩიელებ ბუნებრივია და ვერ გამოვთქვამ ვერავითარ პროგნოზს, თუ როდის რა შეიძლება მოხდეს, იმიტომ რომ საერთაშორისო ურთიერთობებში, განსაკუთრებით მაშინ როცა არის მრავალმხრივი კონტექსტი ძალიან ბევრი სხვა თემა არსებობს რომელიც ასე თუ ისე გავლენას ახდენს თუნდაც შენს საკითხზე. კიდევ ერთხელ ვიტყვი, რომ სწორი მიმართულებით უნდა ვიაროთ და ვფიქრობ რომ სწორი მიმართულებით მივდივართ.

ამერიკის ხმა: სექტემბერში გაეროს გენერალური ასამბლეის 68 სესია გაიმართება, სადაც პრეზიდენტის რანგში ბოლო გამოსვლა ექნება პრეზიდენტ მიხეილ სააკაშვილს. რა საკითხებზე გამახვილდება ყურადღება პრეზიდენტის ბოლო გამოსვლაში?

კახა იმნაძე: იმ საორგანიზაციო საკითხებს, რომელიც ასეთ დროს ავალია მისიას, ბუნებრივია ამზადებს მისია, შესაბამისი დოკუმენტების და საბუთების გაგზავნა ხდება დედაქალაქთან. რაც შეეხება დეტალებს, მე დეტალების საქმის კურსში არ ვარ ასეთი დეტალები ჯერ არ მიგვიღია რა დელეგაცია ჩამოვა, რა შემადგენლობის, კონკრეტულად რა იქნება საუბრის თემა. რადგან ეს არის სამუშაო პროცესი. არის რაღაც ღონისძიებები, რომელიც ბუნებრივია დაგეგმილია გაეროს ასამბლეის ფარგლებში, ღონისძიებები გამომდინარე გაეროს დღის წესრიგიდან, სადაც საქართველო, როგორც წევრი მონაწილეობას ღებულობს. ჯერ კიდევ ნაადრევია პროგრამის დეტალებზე საუბარი რადგან პროგრამა შედგენის პროცესშია.

ამერიკის ხმა: დიდი მადლობა რომ გამონახეთ დრო და იმედი მაქვს „ ამერიკის ხმის“ ნიუ იორკის ბიუროსთან მომავალშიც ნაყოფიერად ითანამშრომლებთ.

თეა თუაშვილი ამერიკის ხმა ნიუ იორკიდან
XS
SM
MD
LG