ბმულები ხელმისაწვდომობისთვის

"ამერიკის ხმა" მოუწოდებს მთავრობებს მკაცრად უპასუხონ ხაშოგის გაუჩინარების საქმეს


"ამერიკის ხმის" დირექტორი, ამანდა ბენეტი საუდის არაბეთელი ჟურნალისტის ჯამალ ხაშოგის გაუჩინარების საქმეს ეხმიანება. მისი თქმით, ხაშოგის მკვლელობა კიდევ ერთხელ უსვამს ხაზს იმ საფრთხეებს, რომლის პირობებშიც მსოფლიოს გარშემო, დღეს, ჟურნალისტებს უწევთ მუშაობა.

„თუ თურქეთის მთავრობის განცხადება ხაშოგის მოტაცებისა და მკვლელობის შესახებ მართალია, მაშინ ეს უკვე მზარდი საფრთხეების და დევნის ტალღის სერიოზულ, ახალ ეტაპს წარმოადგენს“, - ამბობს ბენეტი განცხადებაში.

ის მოუწოდებს მთავრობებს, უპასუხონ ჟურნალისტის შესაძლო მკვლელობის ფაქტს.

„ჩვენ მოვუწოდებთ ყველა მთავრობას უფრო მეტი გააკეთონ ძირითადი ღირებულებების დასაცავად და მკაცრად და შესაბამისად უპასუხონ ამ მძიმე საქმეს, რომელიც ამერიკაში მყოფ ჟურნალისტს და ორ ჩვენს მოკავშირე ქვეყანას შეეხება“, - ნათქვამია ბენეტის საჯარო განცხადებაში.

თურქი სამართალდამცავების განცხადებით, ჟურნალისტი ჯამალ ხაშოგი საუდის არაბეთიდან, რომელიც ამერიკის შეერთებულ შტატებში, ნებაყოფლობით გადასახლებაში ცხოვრობდა, გასულ კვირას თურქეთში მდებარე საუდის არაბეთის საკონსულოში მოკლეს.

მისი საცოლის თქმით, ჟურნალისტი საკონსულოში დაგეგმილი ქორწინებისთვის დოკუმენტების მისაღებად მივიდა. ის ბოლოს 28 სექტემბერს, სტამბოლში მდებარე საუდის არაბეთის საელჩოში შესვლისას ნახეს. საცოლე მას შენობის გარეთ ელოდა. საცოლის განცხადებით, ხაშოგი მას შემდეგ გარეთ აღარ გამოსულა. მან დახმარებისთვის თურქ სამართალდამცავებს მიმართა.

თურქეთის პრეზიდენტმა რეჯეპ ტაიპ ერდოღანმა ჟურნალისტებს განუცხადა, რომ ის „ამცნობს მსოფლიოს [გამოძიების] შედეგებს“. ერდოღანის თქმით, პოლიცია ამოწმებს სათვალთვალო ვიდეო კამერებს საკონსულოს შესასვლელებსა და გასასვლელებში, ასევე სტამბოლის აეროპორტში. პოლიციის თქმით, 2 ოქტომბერს დაახლოებით 15 პირი საუდის არაბეთიდან თურქეთში ჩავიდა და ისინი საკონსულოში იმყოფებოდნენ მაშინ, როცა ჯამალ ხაშოგი იქ მივიდა.

გასულ წელს ჟურნალისტი ვაშინგტონში მას შემდეგ გადავიდა საცხოვრებლად, რაც საუდის არაბეთში დისიდენტების შევიწროება დაიწყეს. ხაშოგი საუდის არაბეთის უფლისწულის მუჰამად ბინ სალმანის ხმამაღალი კრიტიკოსი იყო. ის მასალებს გამოცემა "ვაშინგტონ პოსტშიც" აქვეყნებდა.

სახელმწიფო დეპარტამენტმა აღნიშნულთან დაკავშირებით განაცხადა, რომ ისინი ჯერ არ ადასტურებენ ჟურნალისტის დაღუპვის ცნობებს, თუმცა „ახლოდან აკვირდებიან სიტუაციას“.

გამოცემა „ვაშინგტონ პოსტის“ სარედაქციო საბჭომ კვირას განაცხადა, რომ საუდის არაბეთს, თურქეთს და შეერთებული შტატებს აქვთ პასუხისმგებლობა პასუხი გასცენ ხაშოგის გაუჩინარების საქმეს.

Facebook Forum

XS
SM
MD
LG