"ოქროს გლობუსზე" ისტორიული დრამა "ოპენჰაიმერი" დომინირებდა - შეერთებულ შტატებში ატომური ბომბის შექმნაზე გადაღებული ისტორიული დრამა. ყურადღების ცენტრში ასევე მოხვდა გოთიკური კომედიის ჟანრის ფილმი "საცოდავი არსებები" და ზაფხულში ამერიკული კინოთეატრების ბლოკბასტერი "ბარბი".
ბევერლი-ჰილსში კვირას, 7 ნოემბერს გამართულ დაჯილდოების ცერემონიაზე მთავარი პრიზები "ოპენჰაიმერს" გადაეცა. ფილმმა ჯამში ხუთი "ოქროს გლობუსი" მოიპოვა, მათ შორის - საუკეთესო დრამატული ფილმის, საუკეთესო რეჟისორის და მამაკაცის როლის საუკეთესო შემსრულებლის.
ფილმის რეჟისორია კრისტოფერ (კრის) ნოლანი, პროდიუსერი კი - ნოლანის მეუღლე ემა ტომასი. ამ უკანასკნელის თქმით, კრისს გამორჩეული ხელწერა აქვს და შესწევს უნარი "ადამიანებში საუკეთესო მხარე ისე წარმოაჩინოს, რომ თვითონაც საუკეთესო თვისებებით იყოს წარმოდგენილი". ეს ფართოდ აღიარებული ბრიტანელი რეჟისორისთვის პირველი "ოქროს გლობუსი" იყო.
ფილმმა "საცოდავი არსებები" საუკეთესო მუზიკლების და კომედიების ჟანრში გაიმარჯვა. "ბარბიმ" კი ორი პრიზი აიღო, საუკეთესო სიმღერის და შედარებით ახალი კატეგორიის - საუკეთესო კინემატოგრაფიის და ბილეთების გაყიდვისთვის.
"საცოდავ არსებებში" ქალის მთავარ როლს მსახიობი ემა სტოუნი ასრულებს, "ბარბიში" კი - მარგო რაბი. მოელოდნენ, რომ ქალის როლის საუკეთესოდ შესრულებისთვის, მთავარ ჯილდოს რომელიმე მათგანი აიღებდა. "ოქროს გლობუსის" გამარჯვებული გამოდგა ემა სტოუნი. დრამატული ფილმების კატეგორიაში ანალოგიური პრიზი მოიპოვა ლილი გლედსტოუნმა, რომელიც მთავარ როლს ასრულებს რეჟსორ მარტინ სკორსეზეს ფილმში "ყვავილოვანი მთვარის მკვლელები".
"ოქროს გლობუსზე" გამარჯვებულებს მთელი მსოფლიოდან წარმოდგენლი ჟურნალისტები ირჩევენ. ჟიური დაახლოებით 300 მიმომხილველისგან შედგება, რომლებიც კინოხელოვნების სიახლეებს და მის ისტორიას სისტემატურად აშუქებენ.
გასული წლის ოქტომბერში, ჰოლივუდის უცხოური პრესის ასოციაციამ, რომელიც ყოველწლიურად კინო და ტელეფილმებისთვის "ოქროს გლობუსის" დაჯილდოების ცერემონიას მართავს, 2024 წლის ცერემონიისთვის ჟიურის სრულიად ახალი შემადგენლობა გამოაცხადა. ასოციაციამ მათ უწოდა ყველაზე მრავალფეროვანი ხმის მიმცემი პანელი ჰოლივუდის წამყვანი დაჯილდოების ცერემონიებს შორის.
Facebook Forum