ბმულები ხელმისაწვდომობისთვის

ისრაელის პრეზიდენტის ვიზიტი საქართველოში


რუვენ რივლინი და გიორგი მარგველაშვილი პრეზიდენტის სასახლეში

იერუსალიმში მომხდარი გუშინდელი ტერაქტის მიუხედავად, სადაც ტერორისტმა სატვირთო მანქანით, ისრაელის არმიის ოთხი რეზერვისტი, მათ შორის, სამი ახალგაზრდა გოგონა გაიტანა, ისრაელის პრეზიდენტმა რუვენ რივლინმა არ გადადო პირველი ოფიციალური ვიზიტი საქართველოში.

ორდღიანი სტუმრობა, რომელიც თბილისში დღეს დაიწყო, ორ ქვეყანას შორის, დიპლომატიური ურთიერთობების დამყარების 25 წლისთავს ეძღვნება. ისრაელმა და საქართველომ დიპურთიერთობა 1992 წლის 1 ივნისს დაამყარეს.

საქართველოს პრეზიდენტმა რუვენ რივლინს პრეზიდენტის სასახლეში უმასპინძლა და პირველმა მიუსამძიმრა დაღუპული სამხედროების გამო. გიორგი მარგველაშვილმა აღნიშნა, რომ ისეთი გლობალური პრობლემის აღმოსაფხვრელად, როგორიც ტერორიზმი და „ისლამური სახელმწიფოა“, აქტიური საერთაშორისო თანამშრომლობა ძალიან მნიშვნელოვანია.

ისრაელის სპეცსამსახურების ცნობით, ისრაელის მოქალაქეობის მქონე ტერორისტი, ეთნიკური არაბი იყო, რომელიც სწორედ ტერორისტულ ორგანიზაცია „ისლამურ სახელმწიფოს“ თანაუგრძნობდა. პრეზიდენტმა მარგველაშვილმა კერძოდ ბრძანა:

"გვჯერა, რომ თანამშრომლობა, რომელიც ჩვენი ქვეყნების სახელმწიფოებრიობის და სტრატეგიული ინტერესების აღიარებას ეფუძნება, მიგვიყვანს ეფექტურ გადაწყვეტამდე ტერორიზმის პრობლემისა"
გიორგი მარგველაშვილი, საქართველოს პრეზიდენტი

„მინდა გამოვხატო გულისტკივილი და შეშფოთება იმ ტერაქტის გამო, რომელიც ისრაელში მოხდა. ქართველი მებრძოლები მსოფლიოს სხვადასხვა წერტილში მტკიცედ დგანან გლობალური უსაფრთხოების სადარაჯოზე და ტერორიზმის წინააღმდეგ. ჩვენ ამ ღირებულებების ერთგულებას ვამტკიცებთ არა მხოლოდ სიტყვით, არამედ საქმით.

გვჯერა, რომ თანამშრომლობა, რომელიც ჩვენი სახელმწიფოებრიობის და სტრატეგიული ინტერესების აღიარებას ეფუძნება, მიგვიყვანს ტერორიზმის პრობლემის ეფექტურ გადაწყვეტამდე, როგორც კონკრეტული ტერორისტული აქტებისა, რომლებიც მსოფლიოს სხვადასხვა წერტილში ხდება, ისევ - იმ გლობალური პრობლემისა, რომელსაც ISIS-ის პრობლემა ჰქვია."

პრემიერ მინისტრმა გიორგი კვირიკაშვილმაც პრეზიდენტ რივლინთან შეხვედრა მისამძიმრებით დაიწყო. შემდეგ მხარეებმა ეკონომიკურ თანამშრომლობაზე, ვაჭრობის დინამიკასა და პირდაპირ ინვესტიციებზე გაამახვილეს ყურადღება.

პრემიერი კვირიკაშვილი და პრეზიდენტი რივლინი
პრემიერი კვირიკაშვილი და პრეზიდენტი რივლინი

ბოლო წლებში, ისრაელიდან პირდაპირი ინვესტიციების ოდენობამ შესამჩნევად მოიმატა. თუ 2012-13 წლებში, ეს ციფრი 10 მილიონი აშშ დოლარის ფარგლებში მერყეობდა (9 825 000 $– 2012, 9 850 000 $– 2013), 2014-15 წლებში, ინვესტიციები გაორმაგდა და 19 მილიონ აშშ დოლარს მიაღწია (19 161 000 $ – 2013 წელს, 18 736 000 $ – 2015). თუმცა, 2016 წლის სამი კვარტლის მონაცემებით, ისევ შემცირდა და სულ 3 646 000 აშშ დოლარი შეადგინა.

პრობლემურია ისრაელთან ექსპორტ-იმპორტის ბოლო მონაცემებიც: 2016 წელს, ექსპორტი - მხოლოდ 5 მილიონ აშშ დოლარს აღწევს, იმპორტი სამი კვარტლის მიხედვით კი 9 მილიონს აღემატება, მაშინ, როცა 2015 წელს - იმპორტი ისრაელიდან 22 მილიონზე მეტი იყო. საუკეთესო - 2009 წელს კი - 70 000 000 აშშ დოლარს შეადგენდა.

შედარებით უკეთესი მდგომარებაა ტურიზმის მხრივ: 2016 წელს, ისრაელიდან 92 000 ვიზიტორი შემოვიდა, რაც 2015 წელთან შედარებით, 55 პროცენტით მეტია.

მიუხედავად უვიზო მიმოსვლისა, კვლავ ძალიან მაღალია ისრაელის აეროპორტებიდან უკან გამობრუნებულ საქართველოს მოქალაქეთა რიცხვი, რომლებსაც ისრაელში შესვლაზე უარი უთხრეს. ოფიციალური იერუსალიმი ამას უკანონო შრომით მიგრაციასთან მკაცრი ბრძოლის პოლიტიკით ხსნის.

ისრაელის პრეზიდენტმა რუვენ რივლინმა თბილისში აღნიშნა, რომ თანამშრომლობის გაღრმავებით, საქართველოს და ისრაელის ხალხებს ბევრად მეტის მიღწევა შეუძლიათ:

"ჩვენ, ებრაელებმა და ქართველებმა ბევრ რამეს მივაღწიეთ. მჯერა, რომ ბევრად მეტის მიღწევა შეგვიძლია მომავალში და ეს არის ჩვენი მოვალეობა რომ ამ მიმართულებით ვიმუშაოთ"
რუვენ რივლინი, ისრაელის პრეზიდენტი

„სწორედ ერთობლივი მუშაობის წყალობით, ჩვენ, ებრაელებმა და ქართველებმა ბევრ რამეს მივაღწიეთ. მჯერა, რომ ბევრად მეტის მიღწევა შეგვიძლია მომავალში და ეს არის ჩვენი მოვალეობა, რომ ამ მიმართულებით ვიმუშაოთ. გილოცავთ, რომ თქვენ ახალი მთავრობა ჩამოაყალიბეთ. მჯერა, რომ კარგი დროა იმისთვის, რომ კიდევ უფრო დავაახლოვოთ ჩვენი ეკონომიკა“

77 წლის რუვენ რივლინი ისრაელის რიგით მე-10 პრეზიდენტია. ის ამ თანამდებობაზე ისრაელის პარლამენტმა-ქნესეთმა, 2014 წლის ზაფხულში აირჩია. მანამდე რივლინს ქნესეთის სპიკერისა და კავშირგაბმულობის მინისტრის თანამდებობები ეჭირა.

ეს ისრაელის პრეზიდენტის რიგით მეორე ოფიციალური ვიზიტია საქართველოში. 2001 წელს, თბილისს, ისრაელის რიგით მერვე პრეზიდენტი მოშე კაცავი, ასევე ორდღიანი ვიზიტით სტუმრობდა.

2003 წელს კი საქართველოს დედაქალაქში კერძო ვიზიტით, ისრაელის ყოფილი პრემიერი შიმონ პერესიც იმყოფებოდა, რომელიც 2007 წელს, ისრაელის რიგით მეცხრე პრეზიდენტი გახდა და ამ თანამდეობაზე, ვადის ამოწურვამდე, 2014 წლამდე იმუშავა. პერესის შემდეგ ისრაელის პრეზიდენტად სწორედ რივლინი იქნა არჩეული.

XS
SM
MD
LG