კორონავირუსის გამო დაწესებული შეზღუდვების დასრულება ბრიტანეთში საზეიმოდ აღნიშნეს. მთავრობამ 19 ივლისი "თავისუფლების დღედ" გამოაცხადა.
ბრიტანეთში ორშაბათიდან დაწყებული, აღარ არის სავალდებულო სოციალური დისტანციის დაცვა, ან ნიღბების ტარება, რაც კოვიდ-19-ის გავრცელების შეზღუდვის მიზნით იყო შემოღებული. თუმცა, პრემიერ-მინისტრმა ბორის ჯონსონმა ორშაბათს თქვა, რომ აცრის სერტიფიკატის გარეშე დიდ ღონისძიებებზე დასწრება მალე აიკრძალება.
სექტემბრის ბოლოდან, ღამის კლუბებში თუ მასობრივი თავშეყრის სხვა ადგილებში შესასვლელად, ყველას მოეთხოვება კოვიდ-19-ზე ვაქცინაციის საბუთი. "ტესტზე უარყოფითი პასუხი საკმარისი აღარ იქნება" - უთხრა ლონდონში შეკრებილ ჟურნალისტებს პრემიერმა.
თავად ჯონსონმა ეს დღე კარანტინში გაატარა, მას შემდეგ, რაც ბრიტანეთის ახალ ჯანდაცვის მინისტრ საჯიდ ჯავადს კოვიდ-19 დაუდასტურდა. პრემიერ-მინისტრმა კორონავირუსი უკვე გადაიტანა და "ასტრაზენეკას" ვაქცინით აცრილიც არის.
Facebook Forum