დღეს, როცა უკრაინა დამოუკიდებლობის დღეს აღნიშნავს, ამერიკის პრეზიდენტმა ჯო ბაიდენმა განცხადება უკრაინის უსაფრთხოებითვის განსაზღვრული, უპრეცედენტო დახმარების თაობაზე გააკეთა. 3 მილიარდამდე დოლარის ოდენობის დახმარების პაკეტი ყველაზე დიდი მოცულობისაა, რაც ვაშინგტონმა კიევს 6 თვის წინ, რუსეთის უკრაინაში თავდასხმიდან, დღემდე აღმოუჩინა.
$2.98-მილიარდიანი დახმარება "უკრაინას შესაძლებლობას მისცემს შეიძინოს თავდაცვის სისტემები, საარტილერიო სისტემები, ამუნიცია, უპილოტო საფრენი სისტემები და რადარები, რათა მან გრძელვადიანად შეძლოს საკუთარი თავდაცვის უზრუნველყოფა" - განაცხადა პრეზიდენტმა ბაიდენმა დახმარების გამოცხადებისას. მისი თქმით, "შეერთებული შტატები ერთგული რჩება უკრაინელი ხალხის მხარდაჭერის მიმართ, რომელიც საკუთარი სუვერენიტეტისთვის იბრძვის".
ასევე ნახეთ: ნახევარზე ოდნავ მეტი ამერიკელი ემხრობა უკრაინის მხარდაჭერას, სანამ რუსეთი ქვეყანას არ დატოვებს - გამოკითხვაბაიდენმა ისიც აღნიშნა, რომ უკრაინის 31-ე დამოუკიდებლობის დღე წელს არც ისე ბედნიერია. ერთი დღით ადრე, ვაშინგტონმა უკრაინა გააფრთხილა, რომ რუსეთი მომდევნო დღეებში ახალი იერიშებისთვის ემზადება, რაც სავარაუდოდ, უმთავრესად სამოქალაქო ინფრასტრუქტურაზე და სამთავრობო შენობა-ნაგებობებზე მოხდება. შეერთებული შტატების სახელმწიფო დეპარტამენტმა უკრაინაში მყოფი ამერიკის მოქალაქეებიც გააფრთხილა, რომ ქვეყანა დაუყოვნებლივ დატოვონ.
ახალი დახმარების პაკეტის ჩათვლით, პრეზიდენტ ბაიდენის ადმინისტრაციის მიერ უკრაინის უსაფრთხოებისთვის გაწეული დახმარება ჯამში $10.6 მილიარდს აღწევს. შედარებისთვის, 2014 წლიდან 2021 წლამდე იმავე ტიპის დახმარება $2 მილიარდს არ აღემატებოდა.
ახალი პაკეტი უკრაინის უსაფრთხოების დახმარების ინიციატივიდან მოდის- Ukraine Security Assistance Initiative (USAI). შეერთებული შტატების კონგრესის მიერ დამტკიცებული ინიციატივა, უფლებას აძლევს თეთრ სახლს, რომ უკრაინისთვის განსაზღვრული შეიარაღება მიიღოს სამხედრო წარმოებიდან და არა ამერიკის უკვე არსებული საწყობებიდან.