ბმულები ხელმისაწვდომობისთვის

სენატორები: ელჩზე თავდასხმები უნდა შეწყდეს და პოლარიზაციის დასამთავრებალდ კეთილსინდისიერი დიალოგი გაიმართოს


აშშ-ის სენატორები ჯინ შაჰინი (დემოკრატი, ნიუ-ჰამპშირის შტატები) და ჯიმ რიში (რესპუბლიკელი, აიდაჰოს შტატი)

შეერთებული შტატების სენატში ამერიკის ელჩ კელი დეგნანის წინააღმდეგ და ზოგადად, ბოლო დროს მიმდინარე ანტი-ამერიკულ კამპანიას სენატში ორივე პარტიის წარმომადგენელი სენატორები გამოეხმაურნენ. „ამერიკის ხმისთვის“ მიცემულ კომენტარში სენატორმა ჯიმ რიშმა თქვა, რომ ელჩ დეგნანზე და საელჩოს მთელ გუნდზე თავდასხმები უნდა შეწყდეს. სენატორი ასევე იმედგაცრუებას გამოხატავს იმასთან დაკავშირებით, რომ დაპირისპრების და უნდობლობის კამპანიას მედია სივრცეში დიდი დრო და ძალისხმევა ეთმობა, რაც საქართველოში პოლარიზაციას აღრმავებს.

მიზანმიმართული პოლიტიკური პოლარიზაცია ემუქრება ქართულ საზოგადოებას და მე სულ უფრო მეტად მაწუხებს საქართველოს მომავალი, თუ ის ამ დილემის გადალახვას ვერ შეძლებს
სენატორი ჯიმ რიში

„იმედგამაცრუელებლია იმის მოსმენა, რომ პოლიტიკურად დატვირთული ასეთი რიტორიკა ქართულ მედიაში ამდენ დროს იკავებს. ელჩმა დეგნანმა და ჩვენმა გუნდმა აშშ-ის საელჩოში არაერთხელ გამოხატეს შეერთებული შტატების მხარდაჭერა ქართველი ხალხის სწრაფვის მიმართ, რომ მათი მომავალი ტრანსატლანტიკური საზოგადოებისა და ევროკავშირში იყოს. ეს თავდასხმები ელჩ დეგნანზე, ამერიკის საელჩოზე და ევროკავშირის ყოფილ ელჩ კარლ ჰარცელზე, სრულიად შეუსაბამოა და ისინი უნდა შეწყდეს“, უთხრა სენატორმა რიშმა „ამერიკის ხმას“.

რესპუბლიკელი სენატორის თქმით, საქართველოში მიმდინარე პოლიტიკური უთანხმოება კეთილსინდისიერი დიალოგის გზით უნდა გადაიჭრას, რომლის მიზანიც საქართველოში პოლარიზაციის დამთავრება უნდა იყოს.

„ეს არ არის პირველი შემთხვევა, როდესაც პოლიტიკური უთანხმოება საქართველოში მედიაში საჯაროდ მიმდინარეობს. ამ ტიპის პოლიტიკური უთანხმოება შეიძლება მოგვარდეს მხოლოდ კეთილსინდისიერი დიალოგით და არა მაპროვოცირებელი საჯარო რიტორიკით. ყველა მხარე უნდა დააკვირდეს საკუთარ განსხვავებულ პოზიციებს და იპოვოს საერთო საფუძველი რეალური პროგრესის მისაღწევად. მიზანმიმართული პოლიტიკური პოლარიზაცია ემუქრება ქართულ საზოგადოებას და მე სულ უფრო მეტად მაწუხებს საქართველოს მომავალი, თუ ის ამ დილემის გადალახვას ვერ შეძლებს“, უთხრა სენატორმა რიშმა „ამერიკის ხმას“.

დემოკრატი სენატორი ჯინ შაჰინი ანტი-ამერიკულ კამპანიას პრო-რუსულ ძალებს უკავშირებს. ის აცხადებს, რომ დეზინფორმაცია და გავლენის სხვა ოპერაციები, რუსული სახელმძღვანელოთი წარმოებული უკვე გამოცდილი მეთოდია. მისი თქმით, საქართველოს პარლამენტის წევრები უნდა იყვნენ ის წამყვანი ძალა, რომელიც ორ ქვეყანას შორის ურთიერთბებში უნდობლობის დათესვის მცდელობებს შეეწინააღმდეგებიან.

„სამწუხაროდ, ჩვენ ადრეც გვინახავს ამ ტიპის ტაქტიკა, რაც მიუთითებს რუსეთის მტკიცე ნებაზე, გაავრცელოს თავისი მავნე გავლენა მთელს აღმოსავლეთ ევროპაში და კონკრეტულად ხელი შეუშალოს საქართველოს საკუთარი დემოკრატიული და ევროატლანტიკური მისწრაფებების მიღწევაში. მე მოვუწოდებ ქართველ კანონმდებლებს, მტკიცედ შეეწინააღმდეგონ ამ საშიში დეზინფორმაციის გავრცელებას მათ მიერ, ვისაც სურს საქართველოში დემოკრატიის და მასთან ერთად, ქართველი ხალხის უფრო სამართლიანი და თანასწორი მომავლის შექმნის ჩავარდნა. ეს არის იგივე არაორიგინალური მეთოდები სახელმძღვანელოდან, რომელსაც პუტინი ხშირად იყენებს. საქართველოს კანონმდებლებმა უნდა შეასრულონ წამყვანი როლი უთანხმოების და უნდობლობის დათესვის მცდელობებთან ბრძოლაში. შეერთებული შტატები რჩება ჩვენი დემოკრატიული პარტნიორების მხარდაჭერის ერთგული, რათა საქართველომ ეს კურსი შეინარჩუნოს“, განაცხადა სენატორმა შაჰინმა.

საქართველოში ამერიკის ელჩის საქმიანობაზე კი მან თქვა, რომ კელი დეგნანი სწორედ ამ მიზნის ხელშესაწყობად მუშაობს, რაც ქართველი ხალხის ტრანსატლანტიკურ საზოგადოებაში გაწევრიანებას გულისხმობს. „მე მივესალმები ელჩი დეგნანის გულმოდგინე მუშაობას ამ მიზნის მიღწევის გზაზე”.

ანტი-ამერიკული კამპანია განსაკთრებით ბოლო თვეების განმავლობაში გამძაფრდა. პოლიტიკოების ნაწილი, მათ შორის „ქართული ოცნებიდან“ ოფიციალურად ცოტა ხნის წინ წასული წევრები, ელჩ დეგნანს და მასთან ერთად ამერიკას, საქართველოს რუსეთთან ოში ჩათრევის მცდელობაში ადანაშაულებენ. შეერთებულ შტატებში ამ ბრალდებს როგორც საექსპერტო, ასევე პოლიტიკურ წრეებში „აბსოლუტურ აბსურდად“ აფასებენ.

ელჩზე თავდასხმას გამოეხმაურა ამერიკის სახელმწიფო დეპარტამენტის პრესსპიკერიც. მან განაცხადა, რომ ელჩს ვაშინგტონის სრული მხარდაჭერა აქვს და რიტორიკა, რომელიც ხელისუფლების "ზოგიერთი" წარმომადგენელის მხრიდან ისმის, "მიზნად ისახავს საქართველოს მოქალაქეების ამ მიზნიდან გადახვევას".

ამავე თემაზე

XS
SM
MD
LG