ბმულები ხელმისაწვდომობისთვის

"ფაიზერმა" კოვიდ-19-ის პრევენციისთვის განსაზღვრული აბის გამოცდა დაიწყო


"მეცნიერება გაიმარჯვებს" - წარწერა "ფაიზერის" მთავარ ოფისთან ნიუ-იორკში

ფარმაცევტულმა კომპანია "ფაიზერმა" დღეს განაცხადა, რომ დაიწყო დიდი მასშტაბების კვლევა, რომელშიც ანტივირუსულ აბს გამოცდიან. პრეპარატი კოვიდ-19-ის პრევენციისთვის არის განსაზღვრული.

"ფაიზერის" მედიკამენტის კლინიკური გამოცდის გვიანდელ ფაზაში მონაწილეობას 2 660 ადამიანი იღებს, რომლებიც 18 წელზე ზევით არიან. დაახლოებით ნახევარი მიიღებს ახალ პრეპარატს PF-07321332, მეორე ნახევარი კი - პლაცებოს. აბებს მისცემენ მათ, ვინც იგივე ოჯახებში ცხოვრობს, სადაც ის ადამიანი, რომელსაც კოვიდ-19 დაუდასტურდა.

"ფაიზერმა" იმავე პრეპარატის გამოცდის თაობაზე საჯარო განცხადება პირველად 1 სექტემბერს გააკეთა. აღნიშნული კვლევა განსხვავებულია და დამოუკიდებლად მიმდინარეობს. ის არაჰოსპიტალიზებული სიმპტომური დაავადების მქონე ზრდასრული ადამიანების თერაპიისთვისაა განსაზღვრული. თერაპია დაბალი დოზით „რიტონავირის“ მიღებასაც ითვალისწინებს, რომელიც აქამდეც გამოიყენებოდა სხვა ანტივირუსულ პრეპარატებთან ერთად.

ამერიკულ კომპანიებს "ფაიზერს" და "მერკს", ასევე შვეიცარულ "როშეს" შორის დიდი კონკურენციაა კოვიდ-19-ის საწინააღმდეგო მედიკამენტების განვითარების მიმართულებით. ანტივირუსული აბები ერთის მხრივ იოლად მისაღები უნდა იყოს, დაავადების პრევენციის მხრივ ეფექტურობა უნდა აჩვენოს და საკუთარი უსაფრთხოებაც დაადასტუროს.

წარმატების შემთხვევაში, „ფაიზერში“ ამბობენ, რომ მათი მედიკამენტი საგანგებო ავტორიზაციის აქტის საფუძველზე, შეიძლება ამერიკამ წლის ბოლომდე დაამტკიცოს. ჯერჯერობით, შეერთებულ შტატებში მხოლოდ ერთი ანტივირუსული თერაპიაა დამტკიცებული. ეს არის კომპანია "გილეადში" წარმოებული "რემდესივირი", რომელიც ინტრავენურია, ანუ მისი ორგანიზმში შეყვანა ვენაში ხდება.

კლინიკური გამოცდის გვიანდელ ეტაპზეა კიდევ ერთი ფარმაცევტული გიგანტი „მერკი“. ის არაჰოსპიტალიზებულ პაციენტებზე ცდის პრეპარატ „მოლნუპირავირი“, რათა დაადგინოს, შესაძლებელია თუ არა ჰოსპიტალიზაციის და სიკვდილობის რისკის შემცირება.

Facebook Forum

XS
SM
MD
LG