ბმულები ხელმისაწვდომობისთვის

ევროპა "ფაიზერის" გამაძლიერებელ დოზაზე გადაწყვეტილებას ოქტომბრის დასაწყისში მიიღებს


ევროპის მედიცინის სააგენტო

ევროკავშირის მარეგულირებელი, "ფაიზერ-ბიონტექის" კოვიდ-19-ის ვაქცინის გამაძლიერებელ დოზასთან დაკავშირებით გადაწყვეტილებას რამდენიმე კვირის განმავლობაში მიიღებს. ევროპის მედიცინის სააგენტო ამბობს, რომ მესამე დოზის, ე.წ. ბუსტერის მონაცემები ახლა განხილვის პროცესშია. ევროკავშირში არ გამორიცხავენ, რომ "ფაიზერის" ვაქცინის მესამე დოზის ადმინისტრირება მეორე დოზიდან დაახლოებით 6 თვეში მოხდეს.

"შედეგი ოქტომბრის პირველ რიცხვებშია მოსალოდნელი, თუ რაიმე დამატებითი ინფორმაცია არ გახდა საჭირო" - თქვა დღეს გამართულ ბრიფინგზე ევროპის მედიცინის სააგენტოში ვაქცინის სტრატეგიის ხელმძღვანელმა მარკო კავალიერიმ. მისი განცხადებით, განხილვა რამდენადმე დააჩქარა ინფიცირების შემთხვევებმა, რომლებიც აცრილებში ფიქსირდება.

შეერთებულ შტატებში სურსათის და მედიკამენტების ადმინისტრაციამ (FDA) უკვე დაამტკიცა "ფაიზერ-ბიონტექის" კოვიდ-19-ის ვაქცინის გამაძლიერებელი, მესამე დოზა მოსახლეობის განსაზღვრული ჯგუფებისთვის. გადაწყვეტილებას დღეს დიდი ალბათობით, მწვანე შუქს აუნთებს აშშ-ის დაავადებათა კონტროლის და პრევენციის ცენტრთან (CDC) მოქმედი დამოუკიდებელ მრჩეველთა საბჭო.

ე.წ. ბუსტერზე ავტორიზაცია შეერთებულ შტატებში რამდენიმე ჯგუფზე გაიცა. ესენია: 65 წლის ზევით ამერიკელები; ვისაც სუსტი იმუნიტეტის გამო მწვავე დაავადების განვითარების მაღალი რისკი აქვს და ასევე ის ადამიანები, ვისაც ინფიცირების წყაროსთან უფრო ხშირი შეხება უწევს. ამ უკანასკნელში შედიან ჯანდაცვის მუშაკები, თუ სკოლებში, სასურსათო მაღაზიებში, თავშესაფრებში, პენიტენციალურ დაწესებულებებში დასაქმებულები.

Facebook Forum

ტვიტერი

XS
SM
MD
LG