სირიაში სამხედრო და სამოქალაქო დაპირისპირება გრძელდება. მძიმე არტილერიით შეიარაღებულმა სამთავრობო ძალებმა ოპოზიციას ამჯერად ქვეყნის სამხრეთით მდებარე იორდანიის საზღვრის მახლობლად შეუტიეს.
აქტივისტების თქმით, სირიის არმიის მე-12 ბრიგადა ღამით ქალაქ ბუსრა ალ-ჰარირს დაესხა თავს. ბრიტანელი უფლებადამცველების განცხადებით, დღევანდელი შეტაკების დროს 3 სამხედრო მანქანა დაიწვა. ანალოგიური ბრძოლები სამხრეთის კიდევ რამდენიმე ქალაქში გაიმართა. სააგენტო „როიტერის“ მონაცემებით, სამხედრო დაპირისპირებას ქვეყნის ჩრდილო-დასავლეთ რეგიონებში მდებარე უდაბნოშიც ჰქონდა ადგილი. შეტაკებისას ორი მშვიდობიანი მოქალაქე დაიღუპა და კიდევ ორი სამხედრო მანქანა დაიწვა.
ხელისუფლება ოპოზიციის მიერ დღეს გამოცხადებული საყოველთაო-სახალხო გაფიცვის აღკვეთასაც შეეცადა. თვითმხილველების განცხადებით, უშიშროების ძალები მეპატრონეებს აიძულებდნენ მაღაზიები გაეხსნათ და ამის გამო დამასკოში ახალი დაპატიმრებები მოხდა.