ბმულები ხელმისაწვდომობისთვის

კორონავირუსი უკვე ამერიკის 42 შტატშია, გაიზარდა დაღუპულთა რაოდენობაც


ბოლო 24 საათში ამერიკის შეერთებულ შტატებში კორონავირუსი დაახლოებით 10 შტატში გავრცელდა. დაავადებათა კონტროლის და პრევენციის ცენტრის მონაცემებით, ამ დროისთვის კორონავირუსი 50-დან 42 შტატში ფიქსირდება.

ოფიციალური მონაცემების თანახმად, 36-მდე გაიზარდა დაღუპულთა რაოდენობაც. რაც შეეხება ინფიცირებულთა რაოდენობას, მათი რიცხვი ბოლო 24 საათში 200-მდე გაიზრდა და ამ დროისთვის, კორონავირუსით ამერიკის შეერთებულ შტატებში სულ 1, 215 ადამიანია ინფიცირებული.

კოვიდ-19-ის გამო, საგანგებო მდგომარეობაა გამოცხადებული რამდენიმე შტატში, მათ შორის ნიუ-იორკში, კალიფორნიაში და ვეყნის ქდედაქალაქ ვაშინგტონში - კოლუმბიის ოლქში.

ამერიკის დაავადებათა კონტროლისა და პრევენციის ცენტრის მონაცემებით ირკვევა, რომ კორონავირუსით 125 ამერიკელი მოგზაურობის დროს დაინფიცირდა. ინფიცირებულებთან კონტაქტის შედეგად, კოვიდ-19 დაუდასტურდა 102 ადამიანს, 988-ის შესახებ ინფორმაციის დამუშავება ამ დრომდე ხდება.

რამდენიმე საათში შეერთებული შტატები ევროპიდან ამერიკაში მოგზაურობას დრამატულად შეზღუდავს. განცხადება ამის შესახებ პრეზიდენტმა ტრამპმა ოთხშაბათს, საღამოს 9 საათზე, ერისადმი მიმართვის დროს გააკეთა. შეზღუდვა ჯერჯერობით 30 დღე გაგრძელდება.

დღესვე ცნობილი გახდა, რომ ამერიკის შეერთებული შტატების საკანონმდებლო ორგანო მუშაობის საგანგებო რეჟიმზე გადავიდა. კაპიტოლიუმი მოქალაქეების მიღებას 1 აპრილამდე წყვეტს.

Facebook Forum

XS
SM
MD
LG