ბმულები ხელმისაწვდომობისთვის

რობოტი ადამიანს თანდათან უფრო მეტ სამუშაო ადგილზე ჩაანაცვლებს


სპეციალისტები კვალიფიციურ განათლებას, ტექნოლოგიური პროგრესით შწქმნილი ხელმისაწვდომობის და კომუნიკაბელურობის მაქსიმალურ გამოყენებას გვირჩევენ

ინტერნეტ-გიგანტი „გუგლი“ ამბობს, რომ ის მთლიანად ავტოპილოტზე მოძრავი მანქანის შექმნის ბოლო ეტაპზეა. მეორე გიგანტი „აი-ბი-ემი“ კი „ვატსონზე“ - ისეთ კომპიუტერზე მუშაობს, რომელიც არამარტო ინფორმაციას ინახავს, არამედ მას ითვისებს, სწავლობს კიდეც. საბითუმო ინტერნეტ-კომპანია „ამაზონს“ საწყობები დიდი ხანია ავტომატიზირებული აქვს და ახლა ამანათების მიწოდების საქმეში დრონების ჩართვას გეგმავს.

ტექნოლოგიების განვითარება დღითი-დღე ჩქარდება. ისინი უკეთ ფიქრობენ, უფრო სწრაფ და თანდათან უფრო სწორ გადაწყვეტილებებს იღებენ. ენდრიუ მაკაფი, წიგნის -„ტექნოლოგიების მეორე ერა“ - თანაავტორი, ამბობს, რომ ტექნოლოგიური პროგრესის ახალ ეტაპს ორი მთავარი შედეგი ექნება. პირველი, ეს არის ახალი შესაძლებლობები.

გთხოვთ, დაიცადოთ

No media source currently available

0:00 0:02:23 0:00
ბმული

„მეტი არჩევანი, უფრო მაღალი ხარისხი, მრავალფეროვნება, ფასების კლება... არამარტო სამომხმარებლო საქონელზე, არამედ - საკომუნიკაციო საშუალებებზე, ჯანდაცვის, გართობის სფეროზე. საკვები იქნება ეს, დასვენება, თუ ნებისმიერი რამ, რაც ცხოვრებაში გვჭირდება“ - აღნიშნავს ის.

მაკაფი აღიარებს, რომ ტექნოლოგიური პროგრესის სწრაფი განვითარება ნაკლებად პოზიტიურ შედეგებსაც გამოიწვევს. არც ისე შორეულ მომავალში ჭკვიანი რობოტები ადამიანებს თანდათან უფრო მეტ სამუშაო ადგილზე ჩაანაცვლებენ.

„ტექნოლოგიის თვისებაა - ზოგიერთი ტიპის გამარჯვებულს ცნობს, დიდი რაოდენობით ადამიანს კი უკან მოიტოვებს. ამიტომ ვხედავთ შემოსავლების და მოგების არათანაბარ განაწილებას, უთანასწორობას საშუალებებში, მობილურობაში. ძალზე სერიოზული გამოწვევებია და მათთვის თვალის გასწორება მოგვიწევს“ - ამბობს ენდრიუ მაკაფი ციფრული ბიზნესის ცენტრიდან.

მათ, ვინც ამ გამოწვევების გამო თავს საფრთხეში გრძნობს, სპეციალისტი კვალიფიციურ განათლებას და ტექნოლოგიური საშუალებების უპირატესობების - ხელმისაწვდომობის და კომუნიკაბელურობის - მაქსიმალურ გამოყენებას ურჩევს.

„საგანმანათლებლო რესურსი, რომელიც დღეს ისევ ტექნოლოგიების დამსახურებით ინტერნეტზე მოიპოვება, სრულიად ფანტასტიურია. მსოფლიოს საუკეთესო სპეციალისტების ლექციების უფასოდ მოსმენის საშუალება გაჩნდა. ეს ძალზე პოზიტიურ განვითარებად მიმაჩნია“ - აღნიშნავს მაკაფი.

ინდივიდუალურ ინიციატივასთან ერთად, მაკაფის აზრით, საქმეში მთავრობებიც უნდა ჩაერთონ. მათი დახმარება ახალი საწვრთნელი პროგრამების და საშუალებების შექმნაში, გარემოს დაცვაზე დაფუძნებული მეწარმეობის განვითარებაში და ინოვაციის წახალისების საქმეში კრიტიკულად მნიშვნელოვანია.
XS
SM
MD
LG