ბმულები ხელმისაწვდომობისთვის

ცოტა ხნის წინ, ნიუ-იორკში მოეწყო ჯგუფ “ნიუტონის” სოლისტ ბაბის მხარდამჭერი საქველმოქმედო კონცერტი, რომლის ორგანიზატორი ამერიკაში მყოფი სალომე კორკოტაშვილი იყო. მასთან ერთად სცენაზე პრესტიჟული “Berklee College of Music"-ის სტუდენტები - სოსო გელოვანი და პაპუნა შარიქაძე იდგნენ. სალომე კორკოტაშვილმა ამერიკულ კონკურსში, რომლის მიზანი ახალგაზრდა ნიჭიერი ავტორის აღმოჩენა იყო, 15 ათას მუსიკოსს შორის გაიმარჯვა. თეა თუაშვილი მოგვითხრობს ნიუ-იორკიდან.

პატარა გოგონა, რომელიც წლების წინ “ ვარსკვლავებზე” მღეროდა ახლა უკვე სასცენო სახელს სალიოს ატარებს და სიმღერებს მსოფლიოში არსებულ პრობლემებზე, გრძნობებზე და შეგრძნებებზე წერს. სალომე კორკოტაშვილის სიმღერა " Wayside" “SongBuilder Studios” -ის მიერ ჩატარებულ კონკურსში თხუთმეტი ათას კონკურსანტს შორის საუკეთესოდ შეფასდა. პრიზი ბალტიმორში მდებარე სტუდიაში გრემის ნომინანტ პროდუსერებთან მუშაობა და სიმღერის უსასყიდლოდ ჩაწერა იყო. სალომე კორკოტაშვილი ამბობს რომ ბედნიერია, რადგან “ისე კარგად აეწყო ყველაფერი” რომ მან დამატებით კიდევ ორი სიმღერა ჩაწერა.

სალომე კორკოტაშვილი: ბალტიმორში მქონდა სიმღერის ჩაწერა. ეს ახალი სტუდიაა და ეძებდენენ ახალგაზრდა ტალანტებს. სურთ, რომ იქ ჩაწერილი სიმღერა ამერიკულ რადიოებში დატრიალდეს. ამ სიმღერების მიქსს მალე დაამთავრებენ და გაუშვებენ ყველგან. მიხარია, რადგან ძალიან კარგი პროდიუსერები გავიცანი და ისე უცბად ჩავწერე სიმღერა, რომ კიდევ ორი სიმღერა ჩამაწერინეს უფასოდ.

ამჯერად, შეერთებულ შტატებში ერთი თვით გაჩერდა, თუმცა ამბობს, რომ ბევრი შეხვედრა ჰქონდა და საინტერესო წინადადებებიც მიიღო. ამერიკულ კონკურსში მონაწილეობისთვის მისი კლიპი და მონაცემები მისმა მეუღლემ გაგზავნა, რომელიც დიდი ბრიტანეთის მოქალაქეა. გამკაცრებული სავიზო პოლიტიკის გამო სალომეს ორჯერ უთხრეს უარი ბრიტანეთში შესვლაზე. თუმცა სალიო ნიუ-იორკში სექტემბერში დაბრუნდება და ახალ პროექტებზე მუშაობას დაიწყებს. ის ფიქრობს, რომ შეერთებულ შტატებში გაცილებით მეტს მიაღწევს.

სალომე კორკოტაშვილი: ნიუ-იორკში ვგრძნობ თავს, როგორც სახლში. ამერიკაში ჯერჯერობით მიმართლებს და დაინტერესებაც არის. ძალიან ბევრი ნიჭიერი და მაგარი მუსიკოსი, მომღერალია დღეს ნიუ-იორკში-ქართველები და მინდა ყველას დავეხმარო და ერთად ავიდეთ მწვერვალზე.

ამერიკაში მცხოვრებ ქართველ მუსიკოსებთან პაპუნა შარიქაძესთან, სოსო გელოვანთან და გიორგი ბერიშვილთან ( ხონძი) ერთად სალომემ ჯგუფ "ნიუტონის" სოლისტ ბაბის მხარდამჭერი კონცერტი მანჰეტენზე, " RockWood Music Hall"-ში გამართა.

სოსო გელოვანი: სალოს უნდოდა თავისი მუსიკა ყოფილიყო კონცერტზე. ძველი ჰიტებიდან, რაც ხალხს კარგად ახსოვს, ჯგუფი "პაპარაციდან" მხოლოდ ვარსკვლავები შევასრულეთ, დანარჩენი სულ ახალი პროგრამა იყო. მე სალომესთან ადრე ვუკრავდი თბილისში როცა ვცხოვრობდი.

გიორგი ბერიშვილი ნიუ-იორკის "New School of Music"-ში სწავლობს, ხოლო პაპუნა შარიქაძე და სოსო გელოვანი "Berklee College of Music"-ში სწავლობენ, რომელსაც წელს ვაჟა მანია ამთავრებს. გასულ წელს ეს კოლეჯი კიდევ ორმა ქართველმა მუსიკოსმა გიორგი მიქაძემ და ბაჩა მძინარაშვილმა დაამთავრეს. "ბერკლის" კოლეჯის პირველი ქართველი კურსდამთავრებული 90-იან წლებში გიორგი მელიქიშვილი იყო, რომელსაც აქ - ჯორჯ მელს ეძახდნენ, ახლა ის საქართველოში ცხოვრობს. ამჟამად კოლეჯში, რომელიც შეიძლება ითქვას ქართველი მუსიკოსების თაობებს ზრდის, 7 ქართველი სტუდენტი სწავლობს.

პაატა შარიქაძე: სომეხეთიდან თითქმის არავინ არის. ვეძებდი და ვერავინ ვნახე, არც აზერბაჯანიდან ვიცნობ ვინმეს. ბალტიისპირეთიდან არიან, რუსეთიდანაც არიან, მაგრამ ბევრნი არ არიან. ქართველები რაოდენობრივად ყველაზე მცირედ ვართ წარმოდგენილი. ბევრია ესპანელი, ლათინო-ამერიკელები კორეელები და ჩინელები. ჩვენი ქვეყნისთვის რათქმაუნდა ბევრს ნიშნავს ამ კოლეჯში ამდენი ქართველის ყოფნა.

3 აპრილს, ნიუ-იორკის ბოჰემურ "ისტ ვილიჯში" მდებარე ცნობილ ჯაზ-კლუბში " Blue Note" მუსიკოსი პაატა შარიქაძე მისი კოლეჯის სტუდენტებთან ერთად დაუკრავს. უკვე ოთხი აპრილიდან კი აქ ერთ-კვირიანი პროგრამით ბექა გოჩიაშვილი გამოვა. ცივი და თოვლიანი მარტის შემდეგ მონატრებული გაზაფხული ნიუ-იორკში ქართველების მიერ შესრულებული ამერიკული ჯაზით იწყება.

Facebook Forum

XS
SM
MD
LG