"ედისონ რისერჩი"/"ფორმულას" ეგზიტპოლი: სავარაუდოდ თბილისში მეორე ტური დაინიშნება

საქართველოს დროით საღამოს რვა საათზე ქვეყნის მასშტაბით საარჩევნო უბნები იხურება. რამდენიმე სატელევიზიო არხი უკვე აქვეყნებს კენჭისყრის დღეს ჩატარებული გამოკითხვების, ე.წ. ეგზიტპოლების შედეგებს.

ტელეკომპანია „ფორმულას“ და „ედისონ რისერჩის“ ეგზიტპოლის 18:00 საათის მონაცემების თანახმად, ხმები ასე გადანაწილდა:

თბილისის მერის არჩევნებში "ქართული ოცნების" კანდიდატს, მოქმედ მერს, კახი კალაძეს ხმათა 43 % აქვს, "ნაციონალური მოძრაობის" ნიკანორ მელიას - 39 %, ყოფილ პრემიერს და პარტია "საქართველოსთვის" ლიდერს, გიორგი გახარიას - 7 % .

ამ მონაცემებით, თბილისში სავარაუდოდ მეორე ტური დაინიშნება, რადგან ვერც ერთმა კანდიდატმა ვერ გადალახა 50 %-იანი ზღვარი.

გამოკითხვის ცდომილება თბილისისთვის +/- 3 %-ია, 95 %-იანი სანდოობისთვის თბილისში ჩატარდა 6 783 ინტერვიუ.