ბმულები ხელმისაწვდომობისთვის

ბაიდენი მაღალ პოსტებზე ფერადკანიანი ქალების წარდგენას აგრძელებს


სიუზან რაისი, აშშ-ის პრეზიდენტის ყოფილი მრჩეველი ეროვნული უსაფრთხოების დარგში და მანამდე, ამერიკის 27-ე ელჩი გაეროში

შეერთებული შტატების არჩეული პრეზიდენტი ჯო ბაიდენი მაღალ პოსტებზე ნომინანტების წარდგენას აგრძელებს. მათ შორის კვლავ არიან ფერადკანიანი ქალები.

ბაიდენ-ჰარისის გარდამავალი პერიოდის გუნდის განცხადებაში, რომელიც ხუთშაბათს გამოქვეყნდა, ახალ ნომინაციებს შორის, სამი ფერადკანიანი ქალი სახელდება. ესენი არიან: წარმომადგენელთა პალატის წევრი მარსია ფაჯი, ამერიკის ყოფილი ელჩი გაეროში სიუზან რაისი და კონგრესის ერთ-ერთი კომიტეტის იურისტი კეტრინ ტაი.

მარსია ფაჯი დასახელებულია შეერთებული შტატების განსახლების და ურბანული განვითარების ადმინისტრაციის ხელმძღვანელად. სიუზან რაისი - შიდა პოლიტიკის საბჭოს დირექტორად. კეტრინ ტაი კი შეერთებული შტატების სავაჭრო წარმომადგენლის პოსტზეა წარდგენილი. ფაჯს და რაისს აფრო-ამერიკული წარმოშობა აქვთ, ტაის მშობლები კი ტაივანელი იმიგრანტები არიან.

დამტკიცების შემთხვევაში, ფაჯი ახალი ადმინისტრაციის მაღალ პოსტებზე დასახელებულ ქალთა ჯგუფში აღმოჩნდება. მასთან ერთად, იქ იქნებიან ამერიკის არჩეული ვიცე-პრეზიდენტი კამალა ჰარისი და გაეროს ელჩის პოსტზე წარდგენილი, ლინდა ტომას-გრინფილდი.

ბაიდენმა ხუთშაბათს რამდენიმე სხვა ნომინაციაც დაასახელა. აიოვის ყოფილი გუბერნატორი ტომ ვილსაკი, დამტკიცების შემთხვევაში, ამერიკის სოფლის მეურნეობის დეპარტამენტს ჩაუდგება სათავეში. მან პრეზიდენტ ბარაკ ობამას ადმინისტრაციაში ამ პოსტზე 8 წელი დაჰყო. დენის მაკდონაჰი, რომელიც ობამას დროს თეთრი სახლის ადმინისტრაციას მართავდა, ახლა ვეტერანთა მომსახურების დეპარტამენტის მდივნადაა წარდგენილი.

Facebook Forum

XS
SM
MD
LG