ბმულები ხელმისაწვდომობისთვის

ვინ დგას მოსკოვის ტერაქტის მიღმა?


ვინ დგას მოსკოვის ტერაქტის მიღმა?

რა ზეგავლენას მოახდენს მსგავსი ტერაქტები 2014 წელს დანიშნულ ზამთრის ოლიმპიაზე სოჭში და რუსეთში უცხოურ ინვესტიციებზე?

ჯერჯერობით არავის აუღია თავის თავზე პასუხისმგებლობა დომოდედოვოს აეროპორტში მოწყობილი ტერაქტისათვის. როგორც პუტინი აცხადებს - წინასწარი მოკვლევის თანახმად, აქ ჩეჩენ ტერორისტთა ხელი არ ურევია.

ვინ დგას ორშაბათს მოსკოვის აეროპორტში მომხდარი აფეთქებების მიღმა? რას ფიქრობენ ქართველი ექსპერტები ამ საკითხზე? - ამ თემაზე ჩვენი რესპონდენტი ნატოს შესახებ საინფორმაციო ცენტრის უფროსი თენგიზ გოგოტიშვილი საუბრობს:

" ძალინ რთულია გამოიცნო რუსეთის ხელისუფლების ლოგიკა ხანდახან. როდესაც წინასწარ ამბობენ, რომ ჩეჩნურ კვალს გამორიცხავენ, ესე იგი უნდა ვეძებოთ ახალი კვალი. პირველივე დღიდან, პირადად მე და არა მხოლოდ მე, ველოდი და ველოდები იმას, რომ ეს კვალი წამოიყვანს რუს გამომძიებლებს საქართველოსკენ და არ გამიკვირდება, რომ აღმოჩნდეს ის, რომ დომოდედოვოში თავი აიფეთქა ქართველმა. პუტინის ლოგიკის გამოცნობა ძალიან ძნელია."

კითხვაზე თუ რა ზეგავლენა შეიძლება მოახდინოს ასეთი სახის ტერაქტებმა 2014 წელს დანიშნულ ზამთრის ოლიმპიაზე სოჭში და რუსეთში უცხოურ ინვესტიციებზე, თენგიზ გოგოტიშვილი პასუხობს:

" ჩემი სუბიექტური აზრია, რომ რუსეთმა ოლიმპიადის ჩატარების უფლება დაუმსახურებლად მიიღო. ახლა ამ უფლებას მას ჩამოართმევენ თუ არა, შეუცვლიან თუ არა მიმართულებას სოჭის ოლიმპიადა - ეს უკვე მეორეხარისხოვანი მოვლენაა. დასავლეთში ძალიან ბევრ ქვეყანას არა აქვს მორალური წინააღმდეგობა იმ რუსეთთან თანამშრომლობის გამო, რომელიც დღეს რეალურად არის. შეიძლება პრაგმატიკოსები ვუწოდოთ მათ, შეიძლება უპრინციპოები, მაგრამ ყოველ შემთხვევაში ეს ფაქტია."

თენგიზ გოგოტიშვილი ინტერვიუში ასევე საფრანგეთის მიერ რუსეთისადმი მისტრალის მიყიდვის თემასაც შეეხო:

" ერთადერთი გამოსავალი იმისა, რომ რუსეთის მეზობელ ქვეყნებს არ ეშინოდეთ მისტრალის, ეს არის ის, რომ რუსეთი უნდა დაექვემდებაროს დემოკრატიულ კონტროლს. სანამ ეს ასე არ იქნება მისტრალის გარეშეც რუსეთი იქნება ქვეყანა, რომლის ნაბიჯის გათვლაც იქნება ძალიან რთული. საქართველოს რაც შეეხება კონკრეტულად, პირველი მისტრალი ნამდვილად არ განლაგდება შავ ზღვაში, რადგანც ეს არ არის ისეთი დახურული სივრცის გემი, როგორიც არის შავი ზღვა. იგი გაცილებით უფრო დიდი აკვატორიისთვის არის გათვლილი, ოკეანებისთვის არის გათვლილი და რამდენადაც ჩვენთვის ცნობილია პირველი მისტრალი განთავსდება წყნარ ოკეანეში, მეორე მისტრალი განთავსდება ჩრდილოეთ-ყინულოვან ოკეანეში, ხოლო შემდგომ რა იქნება ეს ჯერჯერობით გაურკვეველია."

ინტერვიუ ჩაწერა ქეთი გაბუნიამ.

XS
SM
MD
LG