ბმულები ხელმისაწვდომობისთვის

დევიდ მაკალისტერი: საქართველოს შეფასება გაგრძელდება დამსახურებების საფუძველზე


ევროპარლამენტის საგარეო ურთიერთობათა კომიტეტის თავმჯდომარე დევიდ მაკალისტერი და საქართველოს პრეზიდენტი სალომე ზურაბიშვილი

ევროპარლამენტის საგარეო ურთიერთობათა კომიტეტის თავმჯდომარე დევიდ მაკალისტერი საქართველოს პრეზიდენტ სალომე ზურაბიშვილს შეხვდა. შეხვედრის შემდეგ გამართულ ბრიფინგზე მან განაცხადა, რომ საქართველომ თავის კონსტიტუციაში ასახა ევროპის კავშირსა და ნატოში გაწევრიანების მიზანი და ამას ძალიან დიდი მხარდაჭერა აქვს მოსახლეობის მხრიდან. მისივე თქმით, ევროპის პარლამენტის წევრები სიამოვნებით დაეხმარებიან და მხარს დავუჭერენ საქართველოს ევროპულ ბლოკში გაწევრიანებას.

მაკალისტერმა აღნიშნა, რომ საქართველოს მოსახლეობა, რომელიც მხარს უჭერს საქართველოს გაწევრიანებას ევროკავშირში, იმსახურებს მშვიდობიანად და უსაფრთხოდ ცხოვრებას თავისუფალ, დემოკრატიულ და აყვავებულ ქვეყანაში.

„მინდა, კიდევ ერთხელ გავუსვა ხაზი ევროპის პარლამენტის პოზიციას, რომ ევროპის გაფართოება რჩება მხოლოდ დამსახურებაზე დაფუძნებულ პროცესად, რომელიც შესაბამისი რეფორმების გატარებას მოითხოვს, განსაკუთრებით კი, დემოკრატიის, კანონის უზენაესობის, ადამიანის უფლებების, საბაზრო ეკონომიკისა და ევროკავშირის განხორციელების სფეროში. ეს პროცესი მიესადაგება აბსოლუტურად ყველა ქვეყანას, რომელსაც ევროკავშირში გაწევრიანება სურს და ის არ არის რამე ვაჭრობის საგანი. საქართველოს შეფასება გაგრძელდება ამ დამსახურებების საფუძველზე და საქართველოს ევროკავშირში გაწევრიანება დამოკიდებულია კოპენჰაგენის კრიტერიუმების დაკმაყოფილებაზე. საქართველოს მოსახლეობა, რომელიც მხარს უჭერს საქართველოს გაწევრიანებას ევროკავშირში, იმსახურებს იმას, რომ იცხოვრონ მშვიდობიანად და უსაფრთხოდ, თავისუფალ, დემოკრატიულ და აყვავებულ ქვეყანაში. ევროპის კავშირი განუყოფლად არის დაკავშირებული მშვიდობასთან, სტაბილურობასთან და კეთილდღეობასთან. 2012 წელს ევროპის კავშირმა ნობელის პრიზიც კი მიიღო იმის გამო, რომ 6 ათწლეულის განმავლობაში უდიდესი წვლილი შეიტანა მშვიდობის, დემოკრატიისა და ადამიანის უფლებების განვითარებაში ევროპაში. ამიტომაც, სულ უფრო და უფრო მეტ ქვეყანას უნდა ევროკავშირში გაწევრიანება".

სააგენტო "ინტერპრესნიუსის" მიერ გავრცელებული ცნობის თანახმად, მაკალისტერმა დასძინა, რომ "საქართველოსთან დაკავშირებით, ჩვენ ბევრს ვმუშაობთ მშვიდობისა და უსაფრთხოების გაძლიერებაზე. საქართველომ თავის კონსტიტუციაში ასახა ევროპის კავშირსა და ნატოში გაწევრიანების მიზანი და ამას ძალიან დიდი მხარდაჭერა აქვს მოსახლეობის მხრიდან. ევროპის პარლამენტის წევრები სიამოვნებით დავეხმარებით და მხარს დავუჭერთ თქვენი ქვეყნის გაწევრიანებას".

XS
SM
MD
LG