კრემლმა ოფიციალურად პირველად აღიარა პრეზიდენტ ვლადიმირ პუტინის შვილებად ეკატერინა ტიხონოვა და მარია ვორონცოვა, რომელთა მიმართაც აშშ-მა სანქციები დააწესა.
პუტინის პრეს-მდივანმა დმიტრი პესკოვმა ჟურნალისტებთან ლაპარაკისას აღნიშნა, რომ კრემლი აუცილებლად უპასუხებს პუტინის ქალიშვილების წინააღმდეგ შემოღებულ სანქციებს და "ამას გააკეთებს ისე, როგორც საჭიროდ ჩათვლის".
რუსეთის პრეზიდენტი ამ დრომდე არც ადასტურებდა და არც უარყოფდა ცნობებს, რომ ენდოკრინოლოგი მარია ვორონცოვა და სამეცნიერო სფეროს მენეჯერი ეკატერინა ტიხონოვა მისი შვილები არიან.
აშშ-მა 6 აპრილს გამოაცხადა მოსკოვის მხრიდან უკრაინის წინააღმდეგ განხორციელებული აგრესიის გამო შემოღებული შემზღუდავი ზომების ახალი პაკეტი, რომელიც ეხება რუსულ ბანკებს - სბერბანკს და ალფა-ბანკს - ისევე, როგორც მაღალჩინოსნებს და მათი ოჯახების წევრებს, პუტინის ქალიშვილების ჩათვლით.
თუმცა, აშშ-ის ფინანსთა სამინისტროს მიერ გამოქვეყნებულ სანქციათა სიაში თავიდან არ ყოფილა ეკატერინა ტიხონოვას და მარია ვორონცოვას სახელები. ოთხშაბათს საღამოს გამოქვეყნდა სიის დამატება, რომელიც შეიცავდა ორ პირს - 1985 წლის 28 აპრილს სანქტ-პეტერბურგში დაბადებულ ვორონცოვას (რომელიც ასევე იყენებს გვარებს ფაასენი და პუტინა) და 1986 წლის 31 აგვისტოს დრეზდენში დაბადებულ ტიხონოვას (რომელიც ასევე იყენებს გვარებს შამალოვა და პუტინა).
გამოცემა Bloomberg-ი აღნიშნავს, რომ პუტინის შვილებისთვის დაწესებული სანქციები არის "სიმბოლური ჟესტი", რადგან არ მოიპოვება ცნობები რუსეთის საზღვრებს გარეთ ტიხონოვას და ვორონცოვას აქტივების შესახებ.
Facebook Forum