ნობელის წლევანდელი პრემია მშვიდობის დარგში ქალთა უფლებებისა და მათი უსაფრთხოებისთვის მშვიდობიანი ბრძოლისთვის, სამმა ქალბატონმა გაიყო.
საპატიო პრიზის ლაურეატები არიან ლიბერიის პრეზიდენტი ელენ ჯონსონ სირლიფი, ლიბერიელი აქტივისტი ლეიმა გბოუი, და უფლებების დამცველი იემენიდან ტავაკულ კარმანი.
ერთნახევარ მილიონიანი საპრიზო თანხა სწორედ ამ სამ ქალბატონს შორის თანაბრად განაწილდება. სამივე პრიზიორის დასახელებისას, ნორვეგიის ნობელის კომიტეტმა განაცხადა, რომ შეუძლებელია დემოკრატიისა და მშვიდობის მიღწევა იმ დრომდე, სანამ ქალებს არ მიეცემათ სრული შესაძლებლობები განვითარების პროცესზე გავლენის მოსახდენად.
ელენ ჯონსონი სირლიფი აფრიკის დემოკრატიულად არჩეული პირველი ქალი პრეზიდენტია. მისი ინაუგურაციიდან 2006 წლის შემდეგ, მან ლიბერიაში მშვიდობის დასამყარებლად დიდი წვლილი გაიღო, ისევე როგორც ქვეყნის ეკონომიკური და სოციალური განვითარებისა და ქალთა პოზიციების დასაცავად.
ლეიმა გბოუი იემენში სხვადასხვა ეთნიკური და რელიგიური კუთვნილების ქალთა მობილიზებისა და მათი ორგანიზებისთვის არის პასუხისმგებელი.
მან ასევე დიდი ძალისხმევა გასწია ქალთა მონაწილეობისათვის არჩევნებში.
თავაკულ კარმანის საქმიანობამ გადამწყვეტი როლი ითამაშა იემენში ქალთა უფლებების გაზრდასა და მშვიდობის მიღწევაში-არაბული გაზაფხულის მოვლენებამდე ადრე და მათ შემდეგ.
ამერიკის სახელმწიფო მდივანმა ჰილარი კლინტონმა სამივე ლაურეატს მიულოცა გამარჯვება და განაცხადა, რომ ისინი განსაკუთრებულ მაგალითს იძლევიან და ქალის როლს წარმოაჩენენ პროგრესის მისაღწევად.
კლინტონმა დასძინა, რომ ამ ქალბატონების შეუპოვრობა, სიძლიერე და ლიდერობა მშვიდობის, შერიგებისა და თანამოქალაქეთა უფლებების დაცვის საქმეში სამაგალითოა და შთაგონებას გვაძლევს. ამერიკელი დიპლომატის განცხადებით, სამი გამორჩეული ადამიანის ნობელის პრემიით აღიარება კიდევ ერთხელ უსვამს ხაზს ყველა სხვა ქალი აქტივისტის ბრძოლას მშვიდობისა და უსაფრთხოებისათვის.
|
African Peace Prize Winners: |
|