საფრანგეთის ჩრდილოეთით მდებარე ქალაქ ამიენში მიმდინარე კვირას მომხდარი ძალადობის ფაქტზე ქვეყნის პოლიციამ ხუთი ეჭვმიტანილი დააკავა. ამ მოვლენამ საზოგადოებას 2005 წლის ამბოხება შეახსენა, რომელმაც მაშინ ქვეყანა შეძრა.
პოლიციის თქმით, დაკავებულები 15-დან 30 წლამდე ახალგაზრდები არიან. ყველა მათგანი ამიენის ჩრდილოეთ რაიონში ცხოვრობს - მხარეში, რომელიც არეულობამ შეაზანზარა. ახალგაზრდებსა და პოლიციას შორის ორშაბათს მომხდარი შეტაკების შედეგად, 16 პოლიციელი დაშავდა ქალაქში, რომელიც პარიზიდან 120 კილომეტრის დაშორებით მდებარეობს.
მეამბოხეებმა დაწვეს მანქანები, გაანადგურეს სპორტული ცენტრი და ცეცხლი წაუკიდეს დაწყებითი სკოლის შენობას. მას შემდეგ, ქალაქში გაძლიერებული დაცვა მოქმედებს, სადაც ამჟამად მშვიდი, თუმცა დაძაბული ვითარებაა.
ამიენში ჩასულ შინაგან საქმეთა მინისტრს, მანუელ ვალსს სტვენით შეხვდნენ.
ვალსის განცხადებით, ძალადობას არანაირი გამართლება არ აქვს. მისი თქმით, უნდა აღდგეს წესრიგი, სიმშვიდე და სამართლიანობა.
ამიენის ერთ-ერთმა ახალგაზრდა მცხოვრებმა, სახელად საიდმა, საფრანგეთის რადიოსთან საუბარში განაცხადა, რომ მან გზავნილი გაიაზრა, თუმცა აღნიშნა, რომ ხელისუფლებამ ძალადობის გამომწვევ მიზეზებზე უნდა გაამახვილოს ყურადღება.
საფრანგეთის სოციალისტურმა მთავრობამ შეტაკების ადგილი - ამიენის მხარე - უსაფრთხოების პრიორიტეტულ ზონად გამოაცხადა. თუმცა, მათი მისამართით მოთხოვნები ისეთი ენდემური პრობლემების მოსაგვარებლად გაისმის, როგორიცაა უმუშევრობის მაღალი დონე და სიღარიბე.
ამიენის მერმა, ჯილ დემაილმა საფრანგეთის რადიოს განუცხადა, რომ ქალაქში, ჩვეულებრივ, სიმშვიდე სუფევს, თუმცა რეალური სირთულეები კრიმინალურ უბნებშია. ძალადობის თავიდან აცილების გარდა, მისი თქმით, აუცილებელია სამართლიანობის სწრაფად აღდგენა.
ამ არეულობამ 2005 წელს მომხდარი ამბოხების ფაქტი შეახსენა საზოგადოებას, რომელიც პარიზის ღარიბ, ემიგრანტებით დასახლებულ გარეუბნებში დაიწყო და შემდგომ მთელს ქვეყანას მოედო.
ამ დრომდე, ასეთი რამ ამიენსში არ მომხდარა. თუმცა, ეს ფაქტი ხაზს უსვამს პრეზიდენტ ფრანსუა ოლანდის წინაშე მდგარ რთულ გამოწვევებს, რომელიც მისი პრეზიდენტობის 100 დღეზე ოდნავ მეტი პერიოდის მანძილზე უმუშევრობის მაღალ დონის შემცირებასა და მდარე ეკონომიკური ვითარების დარეგულირებას ცდილობს.