დამასკოში, სირიის უშიშროების სამსახურის შენობაში ბომბის აფეთქების შედეგად, უმაღლესი რანგის გენერლები დაიღუპნენ. მათ შორის სირიის თავდაცვის მინისტრი დაუდ რაჯხა, მისი მოადგილე, პრეზიდენტ ასადის ქვისლი, გენერალი ასეფ შავკატი და ქვეყნის ყოფილი თავდაცვის მინისტრი ჰასან თურკმანი.
სირიის არმიის სარდლობის განადგურებას 16 თვიანი აჯანყების შემდეგ, ამ ფაქტს ქვეყანაში მიმდინარე სამოქალაქო ომში, შესაძლოა გადამწყვეტი მნიშვნელობა ჰქონდეს.
სირიის სახელმწიფო ტელევიზიის განცხადებით, თავდასხმა თვითმკვლელმა ტერორისტმა მოაწყო, მაშინ როდესაც ოპოზიციური, სირიის თავისუფლების არმია ამტკიცებს, რომ შენობაში მათ მიერ დამონტაჟებული ბომბი აფეთქდა.
როგორც შეერთებულ შტატებში სირიის ოპოზიციის ლობისტი ბრაიან საიერსი ამბობს, თავდასხმა ასადის მთავრობაში შეგზავნილმა ოპოზიციის მხარდამჭერმა მოაწყო.
სირიის საკითხების ექსპერტის, ფრანგი პოლიტოლოგის ფაბრის ბალანჩის განცხადებით:
“ ეს სირიის მთავრობაში არსებულ განხეთქილებაზე მეტყველებს, ოპოზიციის წარმომადგენლები მთავრობაში რჩებიან მისი შიგნიდან აფეთქების მიზნით.“
ლონდონის ჩათემ ჰაუზის ახლო აღმოსავლეთის ექსპერტის ნადიმ შეჰადის განცხადებით, საერთაშორისო საზოგადოების პასიურობის გამო, სირიის ოპოზიცია იძულებულია მიზანმიმართული დივერსიები განახორციელოს კონკრეტული პირების წინააღმდეგ, რაც მის სახეზე უარყოფითად მოქმედებს.
მისი თქმით:
“ რაც უფრო მძაფრდება სამხედრო კონფლიქტი სირიაში, მით უფრო ძნელი იქნება გარდამავალი პერიოდი და იმ მეომრების განიარაღება, რომლებიც ასადის რეჟიმის დამხობაში იღებენ მონაწილეობას.“
ნადიმ შეჰადის აზრით, აღნიშნული ოპერაცის წარმატების მიუხედავად, ოპოზიციის მეომრებს გაუჭირდებათ სამთავრობო ჯარების დამარცხება.
ეროვნული უშიშროების საკითხებში პრეზიდენტ ბუშის ყოფილი მრჩეველი ელიოტ აბრამსი ფიქრობს, რომ ოთხშაბათის აფეთქება ბაშარ ასადისა და ალავიტების სხვა ლიდერებისთვის მკაცრი გაფრთხილება იყო.
მისი თქმით:
“ მართალია თავდაცვის მინისტრი ქრისტიანი იყო და არ განეკუთვნებოდა ალავიტების შიიტური სექტის ელიტას, მაგრამ დანარჩენი გენერლები ამ ელიტის წარმომადგენლები იყვნენ. ბაშარ ასადს კიდევ შეუძლია მართოს ქვეყანა ცალკეული პიროვნებების გარეშე, მაგრამ ყველასთვის ნათელია, რომ რეჟიმის დღეები დათვლილია.“
როგორც დამასკოში მცხოვრებმა ჟურნალისტმა ფარჰად ჰამამ ამერიკის ხმასთან საუბარში განაცხადა:
“ დამასკოში ამჟამად ქაოტური სიტუაციაა შექმნილი, რადგან დაღუპულები სირიის არმიის და უშიშროების სამსახურის ხელმძღვანელები იყვნენ.“
სირიის დედაქალაქში მომხდარმა აფეთქებამ კიდევ უფრო დაძაბა სიტუაცია ქვეყანაში და სამთავრობო ჯარების და შეიარაღებული მეამბოხეების გააფთრებული შეტაკებები გამოიწვია. დამასკოში დაკეტილია მაღაზიების უმრავლესობა და ხალხი ერიდება ქუჩაში გამოსვლას. სირიის არმიაში კი იზრდება დეზერტირების რიცხვი. ახლახანს სირიის შეიარაღებული ძალების ორმა ბრიგადის გენერალმა თურქეთის ტერიტორიას შეაფარა თავი.