ბმულები ხელმისაწვდომობისთვის

რიო 2016: ლაშა ტალახაძის პირველი ოქრო!


საჩხერელი გოლიათის პირველი ემოცია დიდი გამარჯვების შემდეგ

საჩხერელი გოლიათის პირველი ემოცია დიდი გამარჯვების შემდეგ

22 წლის ლაშა ტალახაძის ტრიუმფით აღინიშნა ზაფხულის ოლიმპიური თამაშების მეთერთმეტე დღე, რიოს გარეუბან ჟაკარაპეგუაში მდებარე რიოსენტრში, სადაც საჩხერელმა ძალოსანმა საქართველოს პირველი ოლიმპიური ოქრო მოუპოვა!

არის ოლიმპიური ოქრო მსოფლიო რეკორდით!

არის ოლიმპიური ოქრო მსოფლიო რეკორდით!

157 კილოგრამიანმა ქართველმა გოლიათმა 105 კილოგრამ წონით კატეგორიაში, ატაცში, ზედიზედ ასწია: 205, 210 და 215 კილოგრამი. ჩვენი ძალოსნის მთავარი მეტოქე ოლიმპიური ჩემპიონი, 26 წლის ირანელი ძალოსანი ბეჰდად სალიმი იყო. ირანელმა ატაცში მსოფლიო რეკორდი დაამყარა, ჯამში - 216 კილოგრამი ასწია და აკვრაში გადასვლამდე, 1 კილოგრამით უსწრებდა ტალახაძეს.

კვანძის გახსნა სწორედ, აკვრაში ასპარეზობის განახლებისთანვე მოხდა. სალიმიმ ზედიზედ სამჯერ ვერ დასძლია საწყისი წონა - 245 კილოგრამი და შეჯიბრებას გამოეთიშა.

ლაშა ტალახაძემ კი აკვრაში, ეტაპობრივად აიღო ჯერ 242, შემდეგ 247 და ბოლოს, თამამად წავიდა მსოფლიო და ოლიმპიურ რეკორდზე, 258 კილოგრამზე და ისიც უპრობლემოდ დააფიქსირა!

მწვრთნელი და მოწაფე: გიორგი ასანიძე და ლაშა ტალახაძე, ორივე ოლიმპიური ჩემპიონი

მწვრთნელი და მოწაფე: გიორგი ასანიძე და ლაშა ტალახაძე, ორივე ოლიმპიური ჩემპიონი

საჩხერელმა ძალოსანმა ოლიმპიური ოქრო მსოფლიო რეკორდის დამხობით მოიპოვა, რომელიც 2000 წლის სექტემბრიდან, მსოფლიო ლეგენდას ძალოსნობაში, ირანელ ჰუსეინ რეზაზადეს ეკუთნოდა. აკვრისა და ატაცის ჯამში, ტალახაძემ 473 კილოგრამს მოუყარა თავი, ერთი კილოგრამით გააუმჯობესა, რეზაზადეს 16 წლის წინანდელი რეკორდი.

ასპარზობიდან ირანელი ბეჰდად სალიმის გამოთიშვის შემდეგ, მედლის აღების შანსი - მეორე ქართველ ძალოსანს, 31 წლის ქობულეთელ ირაკლი თურმანიძესაც გაუჩნდა. ქართველმა 207 კგ დააფირსირა ატაცში და 241 აკვრაში, ჯამში 448 კილოგრამი. თურმანიძის კონკურენტი, სომეხი ალექსანიანი იყო, რომელმაც აკვრაში ზედიზედ ორჯერ ვერ დაძლია 254 კგ, რაც იმას ნიშნავდა, რომ პირველად ოლიმპიური თამაშების ისტორიაში, მედალოსნების კვარცხლბეკზე, ორი ქართველი ავიდა!

პირველად ოლიმპიურ კვარცხლბეკზე ორი ქართველი ავიდა

პირველად ოლიმპიურ კვარცხლბეკზე ორი ქართველი ავიდა

ოლიმპიური ოქრო გადაეცა, ახალ მსოფლიო რეკორდსმენს ლაშა ტალახაძეს (აკვრა-ატაცის ჯამი 473 კგ), ვერცხლი - სომეხ მინასიანს (451 კგ) და ბრინჯაო ირაკლი თურმანიძეს (448 კგ).

ქართულმა ძალოსნობის სკოლამ 12 წლიანი პაუზის შემდეგ, ისევ გამოჭედა ოლიმპიური ჩემპიონი. ბოლოს, 2004 წლის ათენის ოლიმპიადაზე, ოქრო გიორგი ასანიძემ მოიპოვა, რომელიც რიოს ოლიმპიადაზე ძალსოანთან ნაკრების მთავარი მწრთნელია. ძალოსნობის ფედერაციის პრეზიდენტი კი სამგზის ოლიმპიური ჩემპიონი კახი კახიაშვილია.

16 აგვისტოს კიდევ ერთი ბრინჯაო საქართველოს, ბერძნულ-რომაულ ჭიდაობაში, ბათუმელმა შმაგი ბოლქვაძემ მოუპოვა და დღეის მდგომარეობით, ჩვენს ოლიმპიურ ნაკრებს: ერთი ოქროს, ერთი ვერცხლისა და სამი ბრინჯაოს მედალი აქვს.

ლაშა ტალახაძე დამოუკიდებელი საქართველოს ისტორიაში, რიგით მეშვიდე ოლიმპიური ჩემპიონი გახდა.

ქართველი ოლიმპიური ჩემპიონები

საქართველოს დროშით

ზურაბ ზვიადაური - ძიუდო, 2004

გიორგი ასანიძე - ძალოსნობა, 2004

მანუჩარ კვირკველია - ჭიდაობა, 2008

ირაკლი ცირეკიძე - ძიუდო, 2008

რევაზ მინდორაშვილი - ჭიდაობა, 2008

ლაშა შავდათუაშვილი - ძიუდო, 2012

ლაშა ტალახაძე, ძალოსნობა, 2016

საბჭოთა დროშით

დავით ციმაკურიძე, ჭიდაობა, 1952

მედეა ჯუღელი, ტანვარჯიში, 1952

რაფაელ ჩიმიშკიანი, ძალოსნობა, 1952

გივი კარტოზია, ჭიდაობა, 1956

მირიან ცალქალამანიძე, ჭიდაობა, 1956

რობერტ შავლაყაძე, მძლეოსნობა, 1960

ავთანდილ ქორიძე, ჭიდაობა, 1960

ნუგზარ ასათიანი, ფარიკაობა, 1964

ვაჟა კაჭარავა, ფრენბურთი, 1964

ვიქტორ სანეევი, მძლეოსნობა, 1968, 1972, 1976

რომან რურუა, ჭიდაობა, 1968

ლევან თედიაშვილი, ჭიდაობა, 1972, 1976

შოთა ჩოჩიშვილი, ძიუდო, 1972

ზურაბ საკანდელიძე, კალათბურთი 1972

მიხეილ ქორქია, კალათბურთი, 1972

ვიქტორ კრატასიუკი, ნიჩბოსნობა, 1972

ალექსანდრე ანპილოგოვი, ხელბურთი, 1976

შოთა ხაბარელი, ძიუდო 1980

ქეთევან ლოსაბერიძე, მშვილდოსნობა, 1980

ვახტანგ ბლაგიძე, ჭიდაობა, 1980

ნინო სალუქვაძე, ტყვიის სროლა, 1988

დავით გობეჯიშვილი, ჭიდაობა, 1988

ვლადიმერ აფციაური, ფარიკაობა, 1988

გელა კეტაშვილი, ფეხბურთი, 1988

ვლადიმერ გოგოლაძე, ტანვარჯიში, 1988

დსთ-ს დროშით

დავით ხახალეიშვილი, ძიუდო, 1992

კახი კახიაშვილი, ძალოსნობა 1992 (1996-2000 საბერძნეთის დროშით)

ლერი ხაბელოვი, ჭიდაობა, 1992

XS
SM
MD
LG